اغتصاب جماعي يومي مُتجدد

مقال محزن ومخزي لكل رجل يسمح بأن يحدث ما جاء فيه أمام عينيه دون أن يتدخل، قرأته على صفحات الفيسبوك. إقرأه على الصفحة الخاصة بكاتبته الأصلية (هنا).

----------------------

النوت دي الفاظها خارجة، بس مش اخرج من انها حقيقة ... بالتالي فـ اللي مش عاجبه كلامها، يطلع برة


.

النوت دي هي تجميع لكل الكلام الممتع اللي بسمعة في شوارع القاهرة طول ما انا ماشية، انا بس فكرت اكتبهم يمكن في رجالة اعرفهم او اشباه رجالة شايفيين ان المعاكسة مداعبة لطيفة او ان لبس البنات هو السبب او السفالات الأعلامية المتعارف عليها..

حبيت بس اشوف هل الكلام ممكن يفرق مع التطنيش العام في رجالة و ستات مصر لما بيشوفوا واحدة حد بيطلع دين اللي خلفوها في الشارع .. انا بقى مش هقعد اقولكوا انتوا عارفين شكل لبسي ايه او انا بمشي كويس عشان طظ يعني مش مضطرة البس اصلا لبس يعجب المتُحترش الحيوان او اللي المفروض يبقى راجل او ست عندها شرف و لما يشوفوا حاجة زي دي ميسكوتوش.

• بـ**** حلوة
• هزي هزي
• طويل على فكرة
• عاوز احطه
• ش***** حلوة
• نفسي اشدك من بـ****
• نفسي اشدك من شعرك
• ك** حلو؟
• عاوز انـ**
• لو عديتي من هنا تاني هــ**
• بتعرفي تــ ؟
• بتاعي و***
• طـ*** جامدة على فكرة
• رجليكي حلوة
• هبوس صوابع رجليكي
• تعالي و هـ*** براحة
• متـ***
• هركــ* عليكي حالا
• مش هسكت غير لما انيـ**

ده الكلام الرومانسي الجميل اللي بيتقال في كل حتة، و اللهي ماشية في شبرا، مصر الجديدة، على سلالم المترو، في الزمالك، في وسط البلد، مصر مليانة عالم قذرة الحقيقة ..

دول بقى غير المرات اللي بنتعرض فيها لوصلة ميكينج سكس كاملة، بمعنى ان في "بني ادم" مريض يفضل ماشي ورا واحدة ويقعد يقولها بالتفصيل ازاي بيحلم يغتصبها مثلا، و الخطوات المُبهجة اللي هيقوم بيها في سبيل تحقيق الفعل ده و لو هي بُصت وراها طبعا يقوم يحوّد او يبعد و لما يطمن انها ماشية و مش هتطلع عين اهلة يكمل وصلة السرير الرخيصة..

ده غير بقى لما واحدة تكون ماشية و تلاقي واحد علا حسة و قال لواحد تاني واقف في مسافة ابعد كتير: "في واحدة جايالك قابل" و لما البنت بقى ميبقاش في اي طريق تحود منه و تضطر تمشي لغاية الحيوان التاني، تسمع نفس الوصلة من الحيوان التاني مع ضحكات لطيفة من الشعب المستهبل المتلقح في الشوارع..

ده غير لما واحدة تكون واقفة في المترو و يقسم عليها تلات اربع عيال اد عيالها مثلا و البشرية بردوا تبقى واقفة تُمارس تنبلة لا مثيل لها.

ده غير بردوا جنبات المترو او الأتوبيسات حتى طابور تذاكر المترو اللي جنبه الجامع العظيم بتاع المحطات، و الناس اللي بتلزق بمنتهى الصفاقة و الجرآة ولا اكنه مكان عام و مفتوح ومفضوح و الناس بتتفرج عليهم عادي اكنهم بيشوفوا فيلم بورن.

حاجة كمان مهمة، شد الشعر و شد اعضاء الجسم او ضربها .. اعتقد ان عدد المرات اللي صدري اتمسك من اهل مصر، تعادل مثلا ربع عدد المرت اللي نزلت فيها الشارع....

ده غير ضرب المؤخرات، احيانا بحس اني مش ماشية في الشارع و اني قاعدة في سرير كبير و في ناس بتبدل عليا..

ده غير اني مرات كتير بالليل ممكن حد يمشي ورايا و ادخل محل استنجد بيه يقولي و انا مالي، و حصلت من اربع سنين في عرض الشارع وطلبت حد يساعدني و لا حد عبرني عادي يعني، ولا حتى حد رضي يشهد..

طبعا انا عن نفسي بضرب و بتخانق عادي يعني، بس مهما عملت يعني، من الأخر، الكلام ده في منتهى المرض، بيأذي الودن و يدمر الأحساس فترة، الواحدة بتحس بأختراق لمنطقة فراغها و هي ماشية في الشارع، بحس اني من اول الشارع لأخرة بيتمارس عليها عملية اغتصاب جماعي.

المشكلة مش في المتحرش بس، في الناس اللي بتتفرج، ايه كمية اللامبالاه دي، انا مبستناش حد ياخدلي حقي، بس لو سحبت نطع رُحت بيه القسم، محدش هيشهد اصلا .. حتى لو مش مطلوب منه يشهد بس حالة التشفي ف العيون لما حد يتحرش بيا، بتحتم فعلا فعل الضرب و رش الأسبراي ف العيون و الضرب في الحتة القاضية.

في مرات كتير ببقى طالعة من المترو متّحَرّشَة و يجي واحد يضربني، وواحد يمسك صدري وواحد يسمعني فيلمة المثير لدرجة مرة وقفت ف نص الشارع اشتم و خلاص، كنت انا نفسي حاسة اني مجنونة.

انا عاوزة لما اسحب اي حيوان من دول القسم الاقي عادي حد يشهد، او ميبقاش مطلوب اني الاقي حد يشهد، عاوزة لما اي بنت تسمع ان في بنات غيرها اخدوا اللي ضايقهم القسم يتعلموا يعملوا كدة، يمكن ساعتها الخرابة اللي اسمها بلد اللي احنا عايشيين فيها تسن قوانيين محترمة ضد التحرش، مش تفكر اصلا انها تلغيها ..

ملحوظة: انا ناس كتير تعرف عني اني بطلت اخرج، و ناس عاشت الدور بقى تقولي متبقيش ضعيفة و الكلام السخيف ده، الأسوأ بقى اني بطلت امشي مع والدي في الشارع او مع اخويا الصغير، لأن بمنتهى السفالة هتبهدل بردوا معاهم .. ساعتها ايه اللي هيحصل؟ خناقة.؟ ضرب؟ احراج.؟ و على ايه .. انا بطلت كل ده ببركة الشارع المصري و بركة امثال عزة القرف.

لما بقول لناس اصدقائي اني مبخرجش متأخر عشان مبحبش تحرش الليل، في كتير منهم بيهزر و يقولي عارفين انك حلوة و مرعفش ايه .. عشان كدة حبيت اقولكم صريح الكلام اهو..

اخر ملحوظة: النوت مش مكتوبة عشان اصعب على حد، واضح جدا من كلامي اني ارجل من تلات ارباع الرجالة اللي منكم، ايوة منكم انتوا اللي بتتفرج على اي واحدة بتُنتهك في الشارع، وواضح للبنات اني اشجع من كتير منهم و اتمنى كلهم يبقوا زيي و يجرجروا الكلاب دول في الشوارع و يبهدلوهم، فأرجوكم، اي واحد ميعرفنيش انا مش هرد على رسايل من نوعية انا اسف و قلبي معاكي .. قلبك في قفصك الصدري الحقيقة و متعزونيش في نفسي انا جزمتي لسة في رجلي و شبشبي الزنوبة يقدر يطرقع على اجدع شنب فرخة ..

اخر ملحوظة نمرة اتنين، بتاريخ 24 ابريل: الهدف الوحيد من كتابة الكلام ده هو تشجيع البنات ميسيبوش حقهم، و انها مهما لبست او اتبصلها نظرة دونية فده مش غلطتها، اللي هيبصلك نظرة دونية هو نفسة اللي اتكلمت عنه فوق و مبيعملش حاجة، بيبص البصة دي لأنه انسان ضعيف و لو هتستني حد يدافع عنك تبقي بتثتبي انك ضعيفة ..

لو في اي سبب او نتيجة من النوت، هو اني القي على مسامعكم الكلام اللي بيتقال، عشان قُبح الواقع لا يتم التعامل معاه الا بالشجاعة في انتزاع الحقوق ..