هذه الأرض ليست للبيع ولا الإيجار وليس لها وكلاء غير المُلّاك

الشغل في العمارة كان عطلان من زمن، من ييجي عشرين سنة.

الجد الحاج الكبير كان لم القرشين اللي حيلته وحطهم في الأرض، ورمى الأساسات وصب الخرسانة، وأخوه الصغير الناصح عرف يسايس موظفين الحي ويظبط ورق التصريحات والعقود والذي منه، وسابها للابن يطلع بالأدوار ويمحر. تِركة تعَيِّش ولاد العيلة. ابن الحاج الكبير اشتغل فيها شوية، بس الدنيا لفت بيه... سابها وعين عليها خفير، وحبّة وولاده زهقوا من بلاوي البُنا ووجع دماغه.

الخفير شاف شغله شوية، بس المال اللي مالوش صاحب بقى. سنة ف سنة بدأ الخفير يأجر الأرض الفاضية قدام العمارة جراج لعربيات الحتة. شوية وخشب المبنا اتخلع واتباع. حبّة كمان وبقى يأجر الأوض ع المحارة كده لولاد الحرام والعيال الشمامين والضَرّيبة.

قعد الخفير في أوضته هو ومراته وعياله، ومابقاش على باله إلا الإيجار اللي جايله، الريع اللي من ورا الأرض المكسرة وبواقي العمارة.

والعمارة بقت حطام مهجور. تمشي بين حيطانها الخشنة رجليك تجرش أزايز البيرة الفاضية والسرنجات البلاستيك، ويمكن تسمع صدى أصوات شهوانية بتحاول تكتم نفسها ف ركن ضلمة... ريحة زبالة وقطط وكلاب ميتة، دبان بيزن ويلزق على وشك ما يِنهَش غير بالضرب. والأرض قدامها مدّق وفي أركانها ريحة بِرَك البول وشياط أكوام الزبالة المحروقة.

وحصل ف يوم إن الولاد أحفاد الحاج الكبير افتكروا الأرض. افتكروها، وقرروا يرَجَّعوها.

الخفير كان واخدها وضع يد خلاص، وبقى معلم ف الحتة، وف ضهره المسجلين اللي كانت أوض عمارته المهجورة بتستر قعدات كيفهم ولياليهم الحمرا.

أحفاد الحاج الكبير الله يرحمه طردوا الخفير ومراته ووولادهم من العزبة اللي كانوا عاملينها لنفسهم. طردوهم، بس داقوا المر من حبايب الخفير... واتعلم على أحفاد الحاج بالمطاوي والسنج والجنازير. بس طردوا الخفير ومراته وعياله، كسّروا الأوضة بتاعتهم، ووقفوا أخيراً ياخدوا نفسهم على ما الفواعلية والونش ينكسوا أشلاء  العمارة القديمة، عشان يطهروا الأرض ويطلعوا بالجديد.

"أخيراً، نبني على نضافة بقى! مبروك ياخويا" قالوها سوا.

ودي كانت آخر حاجة قالوها سوا.

أخ اتمطع ورفع نضارة الشمس على راسه، "يا سلاااام بقى، لو تبقى دي جنينة خضرا كده ولاد الحتة يشموا نفسهم فيها، حوالين نافورة ظريفة ومكتبة استعارية محترمة فيها قاعدة للقراية والدراسة! يااااه ع العز!"

"نافورة ومكتبة إيه يا عم الخواجة" ضحك الأخ التاني أبو بنطلون جينز قديم بهتان "الله يرحم والدك يا عم، إنتا فاكر نفسك مواليد فيينا مركز توتي فروتي؟ إحنا نطلع بسوبر ماركت قطاعي بسعر الجملة، وممكن دكان أدوت كهربا ولا حاجة يا عم يخدموا ولاد الحتة."

نفخ التالت نفس السيجارة، وشوح لهم بإيده، "يابا منين فلوس البُنا والبضاعة أصلاً؟ خلينا ف اللي عارفينه، إحنا نأجر الأرض جراج زي ما هي على ما تُفرَج."

 لم الرابع السبحة في جيب قميصه وهو بيقول لأخواته، "استهدوا بالله بس! إحنا نبني ع الأرض بيت ربنا وجنبه سبيل كولديرات مياه ساقعة، ونعمل مجمع خدمات صغير كده يدي دروس للطلبة ولا مستوصف طبي."

"يا عم الشيخ من قلة المساجد ما هو كل شارع فيه مسجد أهو؟"

"مش أحسن من الجنينة اللي شوية وتتملي عيال وبنات صيع بيحسسوا على بعض؟"

"خليكوا انتوا كده! ما العمل عبادة يا جدعان، نشغل ولاد الحتة ف السوبرماركت!"

"طب بذمتك إنتَ وهو مش الجراج أوقع بدل أحلام اليقظة دي؟!"

واتسحل الاخوات كل واحد بيدور يشوف كام واحد من ولاد الحتة مستعد يساهم في تصميم الجنينة، واللي لم العيال الملتحين يوزعوا كتيبات "فضل تعمير بيوت الله"، واللي يلف ع القهاوي يحشد العواطلية ورا فكرة الدكان وتشغيلهم فيه.

كل ده ولسة الأرض الفاضية قدام أنقاض العمارة جراج لعربيات الحتة، ويا حسرة بقت جراج مجاني، حتى ماعادش في الخفير يلم من صحاب العربيات تعريفة ركنة! أرض مدّق، في أركانها ريحة بِرَك بول وشياط أكوام زبالة محروقة. والعمارة لسة ركام مهجور. تمشي على أطلال حيطانها الخشنة رجليك تجرش من تاني أزايز بيرة فاضية وسرنجات بلاستيك، ومن ورا أكوام التراب صدى أصوات شهوانية بتحاول تكتم نفسها ف الضلمة... ريحة زبالة وقطط وكلاب ميتة، دبان بيزن ويلزق على وشك ما يِنهَش غير بالضرب.

يا ترى دي آخرة حكاية الاخوات الأربعة؟

إشمعنى اللبان الدكر حجابه شفاف

شكر خاص للصديقين د. إسلام أبو الوفا على مراجعة التدوينة، و نادر ابراهيم على فكرة العنوان.

---

مصمم الصورة دي والموافقين عليها اللي بيلزقوها في المدرجات والمواصلات وبينشروها على فيسبوك،

أفهم من كده إنكم شايفين:

• البنت بونبوناية مركونة على رف مستنية اللي "ياخدها" و "يفتحها" و "يتلذذ بيها"؟
• البنت "شئ"، مالهاش إرادة ولا قدرة إلا إنها تستسلم للي بيعمله فيها الدبان اللي بيتلم عليها؟
• كل الناس عقلياتها ونفسياتها زيكم: لو شافت أكتر من وش البنت بتتسحل في حالة سعار جنسي وتنهش البنت؟
• الشهوة بتتولد فيما تراه العين، لا فيما يصوره ويستحضره العقل؟

عندك وصية دينية بحجاب أو غيره، التزم وادعُ للالتزام بها بأدلة وبراهين فقهية ودينية وقِيَمِيَة على عيننا وراسنا، بس بلاش خلط الأمور كده والاستخفاف بعقول ونفسيات الناس!

هو الشخص اللي بيمد إيده على حاجة مش بتاعته، حلها نغطي الحاجة ولا نظبَّط الشخص؟ يبقى نِلِف البنت ولا نلم اللي بيعاكس والمتحرش؟

تعرفوا إن الدول الغربية بتنشر تحذيرات في سفاراتها عندنا لرعاياها "احترسوا من التحرش الجنسي في شوارعهم"؟

مش مصدقين؟

ده مثلاً تحذير انجلترا لرعاياها (هنا):

Reports of cases of sexual assault cases against British nationals-have increased during and since the unrest of January/February 2011. In 2011, we handled 20 cases of sexual assault and six cases of rape. Some assaults were against minors. Many occurred in what were considered to be safe environments e.g. hotel premises. Assaults have also occurred in taxis and on microbuses. If travelling on microbuses, be aware of your surroundings and avoid being the last passenger left on the bus.

ودي كندا (هنا):

Women in particular should avoid demonstrations and large gatherings as there have been reports of serious sexual assaults. Once surrounded by a group it can be difficult to escape.

لو بمنطقكم، يبقى مين اللي يحذر من مين؟ هما اللي يحذروا رعاياهم عندنا مننا، "أكتر شعب متدين"، ولا إحنا اللي نحذر رعايانا عندهم منهم، شعوب العربدة والمجون والخلاعة؟

يبقى المشكلة في ذكور مجتمعنا ولا إناثه؟

يا سيدي افرض البنت لابسة ضيق سنة ولا قصير حبة، وانت عندك حرمان جنسي على ما قسم  وغريزتك مشعوطاك - لو انت مفلوق جوع وماشي في الشارع، بتهجم على أول مطعم يقابلك وتخطف قدرة الفول تفتك بيها، ولا بتلم غريزتك وتسيطر على احتياجك وتشبعه بطريقة سليمة في المكان السليم والوقت السليم؟ يبقى ماتقوليش "البنت لما باشوفها كده بتحرك غريزتي ومابقدرش احكمها". ممكن اعذرك لو ده موسم التزاوج وانت كلب بلدي وطلبت معاك تركب أول كلبة تقابلك في عرض الشارع – بتحصل، بنشوفها، وبنعذرهم، لأنهم كلاب. لكن طالما انت محسوب علينا بني آدم يبقى تلتزم بمبادئ وقواعد إنسانيتنا. لو مُصِّر إن البنت هي اللي بتثير غريزتك وبتفقدك سيطرتك على نفسك، يبقى تكَمِّل الحالة بقى وانزل على أربعتك واسرح في الشوارع قَلِّب في الزبالة مع الكلاب الضالة – هو ده الوسط المناسب للمنطق اللي انت بتقدمه. لأن من أول الخطوات في الفصل بين الإنسان والحيوان كان قرار الإنسان إنه يسيطر على غرائزه وينظمها مش هي اللي تمشيه.

وإياك تستنصح وتقول أنا بانادي بالعري والابتذال! وكأن يعني البديل الوحيد للف البنت إنها تنزل الشارع بالـ thong والـ pushup bra على الجزمة الباليرينا.

ظبَّط منظورك للدنيا. بلاش عقلية إن الدنيا أوضة نوم كبيرة وكل حاجة مآلها السرير. اعتقد إحنا الشعب الوحيد اللي عنده عكس "الخارجة"، جنازة الميت، مش الولادة إنما "الدُخلة"! فطبيعي إطار فكري زي ده ينتج نواب برلمان شايفين الدنيا من عند منطقة العانة... اسم النبي حارسهم أول ما دخلوا تحت القبة أول حاجات جَت على دماغهم كان منع مواقع السكس وتقديم سن الجواز لـ 14 سنة.

على فكرة يا حِمِش انت وهو، العفة مش سلوك خارجي. العفة توجه داخلي ينعكس على السلوك الخارجي. العفة مش الثمرة، دي البذرة. وفي مجتمعنا ده بالحالة دي، اللي محتاجين بذور العفة تنغرس جواهم هما الذكور الشبقين أكتر من الإناث ضحايا النظرة الذكورية الدونية (ولو إني متأكد إن العقلية اللي تصور لراجل إن البنت هي السبب في تحرش الراجل بيها تعجز تماماً عن استيعاب آخر جملة دي).