إشمعنى اللبان الدكر حجابه شفاف

شكر خاص للصديقين د. إسلام أبو الوفا على مراجعة التدوينة، و نادر ابراهيم على فكرة العنوان.

---

مصمم الصورة دي والموافقين عليها اللي بيلزقوها في المدرجات والمواصلات وبينشروها على فيسبوك،

أفهم من كده إنكم شايفين:

• البنت بونبوناية مركونة على رف مستنية اللي "ياخدها" و "يفتحها" و "يتلذذ بيها"؟
• البنت "شئ"، مالهاش إرادة ولا قدرة إلا إنها تستسلم للي بيعمله فيها الدبان اللي بيتلم عليها؟
• كل الناس عقلياتها ونفسياتها زيكم: لو شافت أكتر من وش البنت بتتسحل في حالة سعار جنسي وتنهش البنت؟
• الشهوة بتتولد فيما تراه العين، لا فيما يصوره ويستحضره العقل؟

عندك وصية دينية بحجاب أو غيره، التزم وادعُ للالتزام بها بأدلة وبراهين فقهية ودينية وقِيَمِيَة على عيننا وراسنا، بس بلاش خلط الأمور كده والاستخفاف بعقول ونفسيات الناس!

هو الشخص اللي بيمد إيده على حاجة مش بتاعته، حلها نغطي الحاجة ولا نظبَّط الشخص؟ يبقى نِلِف البنت ولا نلم اللي بيعاكس والمتحرش؟

تعرفوا إن الدول الغربية بتنشر تحذيرات في سفاراتها عندنا لرعاياها "احترسوا من التحرش الجنسي في شوارعهم"؟

مش مصدقين؟

ده مثلاً تحذير انجلترا لرعاياها (هنا):

Reports of cases of sexual assault cases against British nationals-have increased during and since the unrest of January/February 2011. In 2011, we handled 20 cases of sexual assault and six cases of rape. Some assaults were against minors. Many occurred in what were considered to be safe environments e.g. hotel premises. Assaults have also occurred in taxis and on microbuses. If travelling on microbuses, be aware of your surroundings and avoid being the last passenger left on the bus.

ودي كندا (هنا):

Women in particular should avoid demonstrations and large gatherings as there have been reports of serious sexual assaults. Once surrounded by a group it can be difficult to escape.

لو بمنطقكم، يبقى مين اللي يحذر من مين؟ هما اللي يحذروا رعاياهم عندنا مننا، "أكتر شعب متدين"، ولا إحنا اللي نحذر رعايانا عندهم منهم، شعوب العربدة والمجون والخلاعة؟

يبقى المشكلة في ذكور مجتمعنا ولا إناثه؟

يا سيدي افرض البنت لابسة ضيق سنة ولا قصير حبة، وانت عندك حرمان جنسي على ما قسم  وغريزتك مشعوطاك - لو انت مفلوق جوع وماشي في الشارع، بتهجم على أول مطعم يقابلك وتخطف قدرة الفول تفتك بيها، ولا بتلم غريزتك وتسيطر على احتياجك وتشبعه بطريقة سليمة في المكان السليم والوقت السليم؟ يبقى ماتقوليش "البنت لما باشوفها كده بتحرك غريزتي ومابقدرش احكمها". ممكن اعذرك لو ده موسم التزاوج وانت كلب بلدي وطلبت معاك تركب أول كلبة تقابلك في عرض الشارع – بتحصل، بنشوفها، وبنعذرهم، لأنهم كلاب. لكن طالما انت محسوب علينا بني آدم يبقى تلتزم بمبادئ وقواعد إنسانيتنا. لو مُصِّر إن البنت هي اللي بتثير غريزتك وبتفقدك سيطرتك على نفسك، يبقى تكَمِّل الحالة بقى وانزل على أربعتك واسرح في الشوارع قَلِّب في الزبالة مع الكلاب الضالة – هو ده الوسط المناسب للمنطق اللي انت بتقدمه. لأن من أول الخطوات في الفصل بين الإنسان والحيوان كان قرار الإنسان إنه يسيطر على غرائزه وينظمها مش هي اللي تمشيه.

وإياك تستنصح وتقول أنا بانادي بالعري والابتذال! وكأن يعني البديل الوحيد للف البنت إنها تنزل الشارع بالـ thong والـ pushup bra على الجزمة الباليرينا.

ظبَّط منظورك للدنيا. بلاش عقلية إن الدنيا أوضة نوم كبيرة وكل حاجة مآلها السرير. اعتقد إحنا الشعب الوحيد اللي عنده عكس "الخارجة"، جنازة الميت، مش الولادة إنما "الدُخلة"! فطبيعي إطار فكري زي ده ينتج نواب برلمان شايفين الدنيا من عند منطقة العانة... اسم النبي حارسهم أول ما دخلوا تحت القبة أول حاجات جَت على دماغهم كان منع مواقع السكس وتقديم سن الجواز لـ 14 سنة.

على فكرة يا حِمِش انت وهو، العفة مش سلوك خارجي. العفة توجه داخلي ينعكس على السلوك الخارجي. العفة مش الثمرة، دي البذرة. وفي مجتمعنا ده بالحالة دي، اللي محتاجين بذور العفة تنغرس جواهم هما الذكور الشبقين أكتر من الإناث ضحايا النظرة الذكورية الدونية (ولو إني متأكد إن العقلية اللي تصور لراجل إن البنت هي السبب في تحرش الراجل بيها تعجز تماماً عن استيعاب آخر جملة دي).