الضباب

ضباب

بقع دم وريحة عفرة وتراب

غيوم

ولايا تصوت، مجاريح بالكوم

حريق

الثاير اتساوى بالعدو بالندل بالبرئ

ماعدش حد فاهم: العيب ع المسافر ولا الطريق؟

نار قايدة في مباني

نار تحرق اماني

البلد دي وجعاني

زهقت من نفسي ولا الناس؟

حكومة؟ جيش؟ ولا زهقت اصلاً مِ الاحساس؟

اتعامى  وادفن راسي في رمل الصحرا

ولا ارجع تاني في ايد عَلَم وف التانية صخرة؟!

صبايا اتعروا ولدان اتعَوَرْوا

طلع النظام باقي ماوقعش غير صوره!

حاميها غدر بيها جَهَّز نعشها ودق مسمار   

والرصاص مش م الاعادي ده مِ الجار وصاحب الدار!

المصري قتيل في ارضه والجاني ابن بلده

مين ياخد تار القتيل لما اللي سَيَّح دمه ولده؟

قوم تاني يا مصري مصر لسة بتنادي عليك

قوم قبل ما تلقى السلاسل تاني في ايديك

قوم قبل ما يقولوا ماكانتش ثورة دي كَت غشامة طيش

وترجع تاني راضي بقليلك... هدمة وقرش وكسرة عيش

قوم فِز وحياة دم مينا وعلاء والشيخ عماد

قوم عشان شرف البنات قوم عشان عيون الولاد

قوم وماتقعدش تاني غير لما بجد بقى تنتعش دي البلاد!

ربك اسمه العدل، والكافر بالعدل كافر برب العباد