هانزل يوم 25 احتفل بعيد ثورة يناير
هانزل احتفل بأهالي بيلفوا على محاكم ورا دم عيالهم كعب داير
هانزل وسط اللي عايزينها "Happy birthday ثورة!"، وبالونة وكوبونات وطرطور
هانزل احتفل بقانون الحدين الادنى والاعلى للاجور
هانزل احتفل بشباب مسجي فِ القبور
هانزل احتفل بمينا دانيال والشيخ عماد
هانزل احتفل بعذرية سميرة وتعرية غادة وهرسها بالبياد
هانزل احتفل بحبس علاء ومايكل وفقع عينين حرارة
هانزل احتفل بالتحقيق في النيابة مع مظهر شاهين ونوارة
هانزل احتفل بالعادلي يتقدم له تحية، وبشباب متسلسل في سراير مستشفى
هانزل احتفل مع احنا آسفين يا ريس، مع عكاشة وخالد عبدالله وعمرو مصطفى
هانزل احتفل بالإعلام المُغرض وتلفيقه اللي يعِرّ
هنزل احتفل بفقرا زادوا، بعشوائيات لسة محلك سر
هانزل احتفل بترقيع الدستور
هانزل احتفل بالكراسي مع الكتلة والاخوان والوفد والنور
هانزل احتفل بالشرطة اللي بقالها سنة ولسة مارجعتش للحالة
هانزل احتفل ببراءة ضباط السيدة زينب، بشباب 6 ابريل اهل "الخيانة والعمالة"
هانزل احتفل باحراز قضية مبارك: فيديو الهرم وابوالهول
هانزل احتفل بالكبسة على جمعيات المجتمع المدنى
هانزل احتفل والخرطوش والخرزانات لسة معلِّمين في بدني
هانزل وسط البلد احتفل بفوارغ الطلق وبول المُجَنَّد وبِرَك الدم
هانزل احتفل بالثورة اللي وسخوها في عيون الناس خلوها بلا وبهدلة وهَم
هانزل احتفل براسي اللي اترفعت وبيحاولوا يطاطوها تاني
هانزل احتفل وانعش لهيب النار الطاهرة الأولاني
الثورة بَدِت واتنفضت بس من ندالتهم قعدت استكانت
ارواح حبايبنا ودموع اهالينا وعينين اخواتنا ع العواجيز هانت
وبعد سنة كاملة النوايا والمطامع والخفايا والشهوات بانت
الثورة ياهوه روح وفكرة وحالة
يعني نجاحها يتحس يتعاش، مش بس تغيير وشوش وبرتيتة رجالة
هانقول سوا خلّوا الميدان صاحي
وانزلوا تاني في سلمية ماسكين ايد بعض م العِزَب والضواحي
بلدنا كان ميت، شبابنا جري في عروقه، صحاه، ماحدش يقدر تاني يدفنه
الثورة دي بقى وِلْدِنا وعملنا، وإِنّ اللَّهَ يُحِبّ إِذَا عَمِلَ أَحَدُكُمْ عَمَلاً أَنْ يُتْقِنه
0 comments:
Post a Comment