نُشِرَت يوم 7 يوليو 2011؛ كم يحزنني أن كل كلمة فيها سارية
منذئذ وحتى الآن!
حد تاني حاسس ان ثورة يناير كانت من زمان قوي، ييجي من سنين؟
حد تاني حاسس ان اللي باقي دلوقتي منها كام صورة واغنيتين حلوين؟
حد تاني شايف ان الثورة مافشلتش، بس لسة مانجحتش؟
حد تاني حاسس بلدنا قامت م الرقدة على ضهرها، بس لسة مافردتش طولها ماوقفتش؟
حد تاني حاسس ان الثورة زي مراته اتجوزها من 20 سنة - يربطه بيها العشرة، بس راحت ايام الورد والجوابات؟
حد تاني حاسس ان الثورة ولدت اسئلة اكتر ما ربت اجابات؟
حد تاني حاسس ان الثورة كانت حفلة عيد ميلاد - الهيصة خلصت واللمة انفضت، وما باقي غير كوم مواعين؟
حد تاني حاسس اننا زي للي رموا كورة لفوق، فوق قوي - الكورة مانزلتش تاني، ولسة باصين في السما مستنيين؟
---
حد تاني مابقاش عارف هو عايز ايه، بس عارف انه مش ده؟
حد تاني حاسس ان بعد ما كنا يخت بيشق البحر، بقينا بنبلبط في مكاننا بعوامة كاوتش؟
حد تاني واخد باله ان علم مصر ماعادش ع العربيات؟ ماعادش في شبابيك عمايرنا؟ ماعادش في طُرَح البنات؟
حد تاني واخد باله من شكل الميدان النهارده؟ الخضرة بايرة الرصيف مكسر، باعة جايلة والسور اتقشر
---
يا ترى لو نزلت اقول للناس "مبروك الثورة يا مصري!"، هايردوا عليّ يقولوا ايه؟
---
حد غيري محبط ان الثورة اختزلوها في كام قضية مال عام - زيّ اللي جاب عربية كاديلاك، ونزل يبيع عليها ممبار
حد غيري حاسس ان البلد زي اللي نفد بجلده من حريق، بس لسة ماحدش طفا النار؟
حد غيري شايف ان كتير رجعوا ع الكنب والقهاوي، لخاصية "سايلنت" و"انتظار"؟
حد غيري حاسس ان بعد ما لعبنا هجوم واجوان، بقت لعبتنا خط وسط ودفاع؟
وثورة الكرامة والحرية، عايزين يختصروها ف شطحة جعانين ورعاع؟
---
انا نفسي ننزل الميدان، نسَمِّي ونبدأ من جديد
مانرجعش غير بمنهج، وخطة بمرحلة اتنين تلاتة بالتحديد
بورقة وقلم نرسم طريقنا، خطواتنا لبكرة لقدام لبعيد
كفايانا بقي برود ورخاوة، كفاية مط وتمديد
ماعادش ينفع مليونية في يوم جمعة، ومسيرة وبوستر وشعار
البلد عايزة قانون واحكامه، عايزة قيادة ثوار، احرار صناع قرار
عايزة حسم في وضوح وجرأة، ومتابعة بعند واصرار
في الثورة بقى بالذات، القناعة كسل والرضا بالقليل انتحار
0 comments:
Post a Comment