ما ياكش يموتوا ولا يولعوا بجاز ! .. ما هم اللي غلطانين

إحنا إتأثرنا المرادي ليه كده؟

إحنا بنلف حوالين نفسنا المرادي عشان مش لاقيين الحجه بتاعت كل مره اللي تبرر كسلنا و بلادتنا و فشلنا و انكسارنا ونوم ضمايرنا  ... مش عارفين ننام المرادي عشان مش لاقيين الفكرة السحرية إياها اللي نقنع بيها نفسنا فتختفي كل مشاكلنا و حرقة قلوبنا في ثواني ...بدل ما نفضل ناكل في نفسنا و ضمايرنا تأنبنا لحد الموت أو لحد ما ناخد التار من سكوتنا و خضوعنا وقلة كرامتنا، لحد ما ناخد خطوة ضد اللي سامح بموتنا واللي إستباح دمنا وعرضنا.. مش لاقيين الكلمة السحرية اللي تخلينا مرتاحين وفي واحدة من بناتنا قلعوها ملط قدام عنينا (لابسة عباية ع الريق ليه؟)..اللي تخلينا مرتاحين واحنا بنشوف شاب ميت بيترمي في الزباله (إيه اللي وداه عندهم وهم بيضربوا؟) ..ما ياكش يموت ولا يولع بجاز .. حقيقتنا اللي لازم تتغير وإلا هنموت واحد ورا التاني من غير لا نفع ولا قيمة ومن غير ما حد حتى يسأل علينا .. نموت عشان لعبة .. نموت عشان عبث .. نموت عشان ولا حاجة .. نموت عشان يعيش القيصر ..

إحنا مدمنين الأفيون اللي مش لاقيين الأفيونة المرادي.. يا نبطل بصعوبة عشان نعيش ...يا نكمل بكسرة نِفس عشان نموت.

ولا أقولك ... انت هتتعب ضميرك ليه ..سيبه نايم .. السبب المرادي هو اليافطة أو الواد اللي كتب بوست على فيس بوك ..أو المؤامرة الخفية ..و إنت ..إنت زي الفل و اللي بيحكمك زي الفل و مشجعي الكورة في بورسعيد زي الفل و الداخلية زي الفل و تأمين المباريات زيــــــــــي الفل..نااااااااااااااااااااااااااااام

بقلم نادر ابراهيم